Die Projektgruppe „Heimatfreunde Dialekt“ arbeitet auch weiterhin an der Sammlung von Berichten und Geschichten aus der guten, alten Zeit und hält diese im Dialekt der Heimatgemeinde Nachtsheim fest. Hier ein Beitrag der Kümmerin Maria Steffens:
De Dräschmaschinn kütt!
Wenn Juni – Juli dat „Hööh“ on de Gromech, em „Dreuje“ woe, dann jeng et Juli-August met de Frücht weide. Für de Ääh (Ernte) mosst die Frücht schön stohn onn dreusch sein, für allem richtich reif. Die Sähns wue jekloppt udde jedängelt. Ömm die Frücht ze mähe, kohm onn die Sähns nach enn Rääf, der die Früchthalme schön en Reihe loescht. Met de „Kromm“ (Sichel) doot ech dann die Haleme zu Jorwe beinanne raafe onn met Strühbännele zesommet benne, die ech nach extra mache moßt.
Noher stallten mir die Jorwe zo Kaaste zesommet zomm treuje!
Dat soch ömme schön aus, alles en Reih on Glied!
Wenn die janze Fälle awjemäht wore, konnten die üschte Kaaste att Hääm en de Scheue jeforre wäre.
Änn August (Boose Kirmes) moßt alles emm Dreuje sein. Enn jodde Johre jeng die Frücht net all enn de Scheue. Dofür woe en extra Dräschplatz enn Streite von der Noeseme Jemähn frei jenn, bu mir dann osse „Boer“ (Haufen) obschlohn konnte. Die Jorwe moßten janz akkurat opjesatt wäre, on omm Schluß kohm enn gruß Plan üwwe de janze Boer, domet die Frücht nett naass wue.
Wenn Schötze Konrad emm Herst dann sein schön Dreschmaschinn uss de Garasch holt, dann feng der em Lohndrusch zeüscht bei joddem Wedde ob em Dräschplatz onn ze dräsche. Donoo kohmen dann von Haus zo Haus die janze Scheuere dronn. 
Beim Strühboer op em Dräschplatz braucht me net su vill Leut, bi en de Scheue.
Mir moßten dehääm mindestens 10 Mann dinge! Bei denne Leut moßte me dann wiee dejänt helefe. Su woe me de janze Wente üwwe bei irjendännem zomm hälefe debei.
Om schwäste woe et awwe, Sackträje ze fenne. Dat mossten storke Kerle sein, die all die schwäre Körnesäck bess opp de Speiche drohn mosste. En ville ahle Häuse woren die Trappe recht schmoll onn steil.
(Späde hatten mir e Körnejebläse. Awwe dann woe noher dat janze Haus voll Stöpp durch dat Jebläse.)
Schötze Konrad als Maschinist sooß ohwe opp der Dräschmaschinn omm Trichter, on doot fürsichtich de oppjeschniddene Jorwe en die Strühwalz, die die Körne ausschlooch. Die Körne leffen dann automatesch enn die onnjehängte Körnesäck. Dat frösch jedräschte Strüh kohm met Kuedel jebonne, als Joerwe wie henne uss de Maschinn. Moneschmohl fräckt och at ääs de Kuedel. Met änem „Fluch“ moßt alles awjestallt wäre, bess dat Knöppe wie klappe doot.
Bei jeder verschiedene Früchtsuet moßten och die Siwwe jewääzelt wäre: Kue, Wääz, Howwe! (Korn, Weizen, Hafer!)
Ähle Paul holef oft aus, wenn de Konrad kään Zeit hat.
Dat grüsste Konststöck für de Maschinist woe, die Dräschmaschinn met em Bulldog hoerjenau enn die eng Scheuere herren jeforre ze kreie. Der Maschinist on die Sackträje wuren em Haus beköstescht.
Der Dräsch – Daach woe ömme en onsträngende Daach!
Em Wente wure dat frösche Strüh met Hööh zo Häcksel jeschnidde met de Häckselmaschinn.
Üwwe dat Häcksel kohmen nach jekrötzte Rummele. Dat woe dat Fodde für oos Veh em Wente.
Em Kresch wuren met dem frösch jedräschte Strüh die Strühsäck wiee neu on prall jeföllt für all die Bätte em Haus.
Moneschmol wue och Koof jeholt, awwe die doot die üschte Zeit schwäh jucke.
Heut kütt me wiee op die jesonne „Bettfüllung“ zerröck.
Sojohr en feine Hotels kann me jänt Bezahlung emm „Hööh“ schloffe.
Also war doch vieles gut in der guten, alten und armen Zeit!